Blogg

Fjórði tapleikur KKF Þóris í röð staðreynd eftir frekar sveiflukenndan leik gegn reynsluboltunum í HK í Kennaraháskólanum í hádeginu á laugardag.  Þar getum við aðeins okkur sjálfum um kennt, en höfum vonandi á sama tíma lært okkar lexíu.  Byrjunarliðið skipuðu þeir Hlynur, Viðar, Helgi, Maggi og Bjössi.  Á bekknum voru Sigurjón, Benni, Einar Valur, Oddur, Þórir og Jón Ívar.

Fyrsti leikhluti byrjar á því að Bjössi setur niður þrist og Helgi bætir við tveimur vítaskotum í kjölfarið.  HK-menn svara þó fljótlega með tveimur körfum.  Hlynur tekur sig til og ræðst þá á körfuna og skilar fimm stigum í hús á sömu mínútunni.  Helgi heldur svo áfram að bæta við stigum af vítalínunni og staðan þá orðin 12-4 fyrir okkur.  HK ná að klóra aðeins í bakkann en við tökum annað áhlaup á þá og setja Helgi og Viðar niður næstu 7 stig fyrir okkur, áður en þjálfari HK (Árni) minnkar muninn í 19-8, en hann hafði þá skorað síðustu 6 stig HK-manna.  Við misnotum 3 vítaskot í röð, eftir annars góða byrjun af línunni, en svo náum við öðrum góðum kafla og staðan því eftir fyrsta leikhluta 27-15, okkur í vil.

Í byrjun annars leikhluta skiptast liðin á því að skora, en smá kæruleysi hjá okkur verður til þess að eftir aðeins fjögurra mínútna leik í fjórðungnum höfðum við fengið á okkur 11 stig gegn fjórum.  Við rönkum við okkur á ný og þristar frá Hlyn og Einari og tveggja stiga karfa frá Helga koma okkur aftur í þægilega stöðu, 39-26.  Þá fer heldur að halla undan fæti hjá okkur og taka HK tvær góðar skorpur á síðustu þremur mínútum fjórðungsins, þar af síðustu 8 stigin.  Tveir menn leiddu sérstaklega þessa stórsókn HK-manna, leikmaður nr. 10 (Hjörtur) setti á okkur 13 stig í leikhlutanum og leikmaður nr. 8 (Einar) setti 11.  Staðan jöfn í hálfleik, 46-46.

Þriðji leikhluti fer seint í sögubækurnar fyrir góða frammistöðu af okkar hálfu.  Við klikkum úr fyrstu 7 tveggja stiga skotunum okkar utan af velli, en Viðar nær að setja tvö vítaskot.  Það rata þó að lokum 3 skot í körfuna í leikhlutanum og koma þau öll frá Viðari.  Við hittum úr 3 af 17 skotum og töpum fimm boltum í fjórðungnum. Viðar með 8 stig, HK með 17 og staðan því alls orðin 54-63, HK-mönnum í vil.

Í fjórða leikhluta missum við svo endanlega tökin og náum ómögulega að stöðva HK.  Þeir taka tvo góða kafla og setur áttan m.a. á okkur tvo þrista og með þeim seinni kemur hann HK í 18 stiga mun.  Þá kemur loks góður kafli hjá okkur og með 8 stigum í röð (Bjössi og Einar með sína körfuna hvor og Oddur með tvær) og staðan skyndilega komin í 70-80.  Við förum að pressa þá aðeins og sendum þá miskunnarlaust á vítalínuna, þar sem þeim bregst óvænt nokkuð bogalistin.  Oddur setur þrist og Helgi tvö víti og enn pressum við.  Liðin skiptast áfram á að skora af vítalínunni, án þess þó að við komumst nær en í 8 stiga mun.  Oddur skorar svo lokakörfuna undir blálokin og 8 stiga tap því staðreynd, 79-87.

Athyglisverðir punktar úr leiknum:

• Eigum einn okkar besta fjórðung í lengri tíma, spilið flott, vörnin góð, skotin að rata og vítin að fara ofaní - en það dugir því miður skammt
• Við tökum 51 frákast í leiknum, en það er heldur ekki nóg til að vinna leikinn, þurfum kannski svolítið að hugsa hvað við ætlum að gera við boltann EFTIR að við tökum frákastið
• Vítin voru skyndilega ekki okkar mesti höfuðverkur - æfingarnar skapa greinilega meistarann
• Pressan undir lokin skilaði sínu, við fengum smá séns til að komast inn í leikinn aftur, eftir að HK fóru óvænt að misnota vítaskotin sín
• Undirritaður (Jón Ívar) fékk sína fyrstu óíþróttamannslegu villu á ferlinum, eftir að hafa þrykkt tólfunni fullharkalega í gólfið undir lokin.  Við ætluðum jú að brjóta, en þetta var kannski fullmikið af því góða
• Einar Valur á "Magic moment"-leiksins eftir no-look-sendinguna á Þóri, sem setti að sjálfsögðu sniðskotið sitt niður